Bitarenze Gashyantare inganda zose zigomba kwimuka i Gikondo

 

Izo nizimwe mu nganda zubatse I Masoro(Foto/Ububiko)

Gakunda yo kwimurira i Masoro inganda   14 zikorera  mu gishanga   i Gikondo  mu Karere ka Kicukiro  umujyi wa Kigali , yatangiye  mu mwaka wa 2011, ariko  hamaze kwimurwa   izigera ku 9 gusa.

Ruzibukira Alex ushinzwe inganda nto n’iziciriritse muri Minisiteri y’ubucuruzi n’Inganda, aratangaza ko ukwezi gutaha (Gashyantare) kuzasiga zose uko ari 14 zimutse.

Ubusanzwe inganda ntizigomba kuba zubatse ahantu ho mu bishanga kimwe no hafi y’ahantu hatuwe. Ni muri urwo rwego hashyizweho igice cyihariye hagenewe guteza imbere ubucuruzi n’inganda.

Uyu muyobozi asobanura ko kugira ngo hafatwe icyemezo cyo kwimura inganda zikorera i Gikondo zijya I Masoro byari ukugirango ngo bazikure mu gishanga ndetse ntizibangamire abatuye hafi yacyo.

Igice cyagenewe kwimurirwamo inganda, igice cya mbere (Phase 1), cyose   cyamaze kuzura, kikaba gifite ubuso bwa hegitari 98,  naho igice cya kabiri (Phase 11) cyo kikaba gifite ubuso bwa hegitari 178 kitarubakwamo.

Ruzibukira Alex ati, "inganda zigera ku 9 ni zo zimaze kugerayo ariko zikaba zitaratangira gukora kuko bakirimo gushyiramo ibyuma neza kugira ngo babashe gukora”.